Польшча з 21 лютага абмяжоўвае рух беларускіх грузавікоў на апошнім дзейным пункце пропуску з Беларуссю «Кукурыкі — Казловічы», паведамляе МУС краіны.
Такая мера прынятая ў адказ на забарону польскім перавозчыкам заязджаць на тэрыторыю Беларусі праз межы з Літвой і Латвіяй.
Рашэнне распаўсюджваецца на рух фураў з беларускімі нумарамі, яно набудзе моц з 19.00 21 лютага і спыніць дзеянне толькі тады, калі беларускі бок здыме абмежаванні для польскіх перавозчыкаў.
Пры гэтым абмежаванне не распаўсюджваецца на пасажырскія перавозкі на памежным пераходзе ў Тэрэспалі. Беларускія перавозчыкі могуць заязджаць у Беларусь праз Літву і Латвію.
Польская памежная служба ўдакладняе, што абмежаванні не будуць распаўсюджвацца на транспарт, зарэгістраваны ў Польшчы, дзяржавах ЕС, Еўрапейскай асацыяцыі свабоднага гандлю (ЕАСГ) і ў Швейцарыі. Грузавікі з іншых краін і рэгіёнаў афармляць на памежным пераходзе ў «Кукурыках» не будуць. Паведамляецца, што рашэнне прынятае «ў мэтах забяспечання грамадскай бяспекі».
Нагадаем, Польшча з 10 лютага прыпыніла працу пункта пропуску «Баброўнікі» на мяжы з Беларуссю ў адказ на вынясенне суровага палітычнага прысуду журналісту, прадстаўніку польскай меншасці ў Беларусі Андрэю Пачобуту (у дадатак мытнікі з пункта «Баброўнікі» былі затрыманыя па абвінавачванні ў садзейнічанні кантрабандзе).
Пасля гэтага ў МЗС Польшчы паведамлялі, што разглядаюць і поўнае закрыццё мяжы, у той жа час іншыя польскія ведамствы абяцалі перавозчыкам, што грузавы пункт «Кукурыкі — Казловічы» спыняць працу не будзе.
16 лютага Аляксандр Лукашэнка на сустрэчы з журналістамі назваў закрыццё пунктаў пропуску «эканамічнай правакацыяй» і прыгразіў мерамі ў адказ. На наступны дзень МЗС заявіў пра высылку польскіх дыпламатаў, а ўрад Беларусі ўвёў абмежаванні на ўезд грузавікоў польскіх перавозчыкаў: ім цяпер можна заязджаць на тэрыторыю нашай краіны толькі праз беларуска-польскі ўчастак мяжы. Пасля гэтага ў Польшчы прыгразілі прыняць аналагічныя меры ў дачыненні да беларускіх перавозчыкаў.