Польшча з 1 чэрвеня прыпыняе рух праз польска-беларускую мяжу зарэгістраваных у Беларусі і Расіі фур з таварамі. Адпаведная пастанова была апублікаваная 29 траўня.
З 1 чэрвеня да асаблівага распараджэння будзе прыпынены грузавы рух на мяжы з Беларуссю грузавых аўтамабіляў, цягачоў, прычэпаў, у тым ліку паўпрычэпаў, і аўтацягнікоў, зарэгістраваных на тэрыторыі Беларусі і Расіі.
У Дзяржаўным мытным камітэце Беларусі лічаць, што такая мера «пагоршыць становішча для еўрапейскага бізнесу».
«Новаўвядзенне Польшчы забараняе суб’ектам гаспадарання Еўрасаюза ажыццяўляць перачэпку беларускіх і расійскіх прычэпаў. Перагрузка тавараў пакуль застанецца актуальнай, але гэта больш затратна па часавых і фінансавых крытэрах і яшчэ больш пагоршыць стан справаў еўрапейскага бізнесу. Беларуская мытня працягне прымаць усе меры для развіцця ЗЭД, максімальна магчымага афармлення транспарту, эфектыўнага правядзення мытнага кантролю», — паведамілі ў ДМК.
Адзначым, што чарговае абмежаванне з боку Польшчы наўрад ці нешта кардынальна зменіць для беларускіх грузаперавозчыкаў. Еўрасаюз забараніў аўтамабільныя грузаперавозкі, уключаючы транзітныя, для беларускіх і расійскіх кампаній. Праязджаць у ЕС пасля гэтага маглі беларускія фуры па спецыяльных прапусках. Іх маглі атрымаць, да прыкладу, фармацэўтычныя, медыцынскія, сельскагаспадарчыя кампаніі. Усім астатнім грузавікам з Беларусі і Расіі ўезд у Еўропу забаранілі яшчэ 9 красавіка мінулага года.
Адметна, што рашэнне ў Польшчы прынялі ў той дзень, калі Вярхоўны суд Беларусі пакінуў без задавальнення апеляцыю журналіста міжнароднага канала грамадскага тэлебачання Польшчы Polonia, актывіста Саюза палякаў Беларусі Андрэя Пачобута, асуджанага на восем гадоў калоніі.
Чытайце таксама
