Беларусь «небяспечная для Захаду аўтарытэтам, самастойнасцю і сілай дзяржавы». Такое меркаванне выказаў Аляксандр Лукашэнка 30 чэрвеня падчас свайго выступлення, прымеркаванага да Дня Незалежнасці. Яго прамову апублікавала прэс-служба.
Выступаючы ў Палацы Рэспублікі перад выбранай аўдыторыяй, палітык чарговым разам абрынуўся з прэтэнзіямі на краіны Захаду, якія, паводле яго, «лепяць з нас ворагаў, таму што баяцца».
— Не ў тым сэнсе, што тут агрэсары. Мы для іх небяспечныя аўтарытэтам, самастойнасцю і сілай беларускай дзяржавы. Урэшце, гэта самае галоўнае, — сваім прыкладам, — сказаў Лукашэнка.
Звяртаючыся да краін Заходняй Еўропы, якія толькі што крытыкаваў, Лукашэнка пры гэтым адзначыў, што «мы можам быць цікавыя і карысныя адно аднаму ва ўсіх сферах: эканамічнай, навуковай, адукацыйнай, культурнай».
— Па сутнасці, нават адрозніваючыся нацыянальнымі інтарэсамі, каштоўнасцямі, традыцыямі, мы, краіны Усходняй і Заходняй Еўропы — нашага агульнага дома, маглі б і павінныя развівацца разам, — падкрэсліў Лукашэнка.
Ён таксама чарговым разам заявіў, што свет знаходзіцца «ва ўмовах беспрэцэдэнтнага ваенна-палітычнага крызісу сусветнага маштабу». Пры гэтым падкрэсліў, што «галаву Еўропы на ядзерную гільяціну» кладзе не ён — чалавек, дзякуючы якому Расія размясціла сваю тактычную ядзерную зброю ў Беларусі, — а «заходнія палітыкі».
— Цяпер стала модна казаць пра цэнтры прыняцця рашэнняў. Дык вось, каардынаты гэтых цэнтраў нам да міліметра вядомыя. І пазаўчора яны выразна і ясна вызначаныя і зацверджаныя мною на ваенных картах, — прыгразіў Лукашэнка.
Палітык падкрэсліў, што разам з прэзідэнтам Расіі Уладзімірам Пуціным гатовы «адказаць адэкватна», калі «бяспека нашых народаў акажацца пад пагрозай»
— Калі дзяржаўнасць, незалежнасць, тэрытарыяльная цэласнасць, бяспека нашых народаў акажуцца пад рэальнай пагрозай, мы, нават не раздумваючы, адкажам адэкватна. Не выпрабоўвайце нашае славянскае цярпенне і свой лёс, — папярэдзіў Лукашэнка.
Ён таксама заявіў, што на Захадзе нібыта «ненавідзяць усё славянскае», квапяцца «на нашы рэсурсы» і «паскоранымі тэмпамі ўзбройваюць Польшчу», робячы з яе «наступны пасля Украіны проксі-палігон у супрацьстаянні з Беларуссю і Расіяй». Дасталася і краінам Балтыі. Лукашэнка заявіў, што здзіўлены «самабойчай упартасцю» з якім нашыя паўночныя суседкі імкнуцца «стаць ударным атрадам NATO».
— Нашаму ўраду, Міністэрству замежных справаў варта прапанаваць ім план добрасуседства і міру, — сказаў Лукашэнка. — Мы чарговым разам падаём вам руку міралюбнасці не таму, што спалохаліся вашых «палкоў» і «харугваў». Мэты іх нікчэмныя, і планы вар’яцкія.
Скончыў сваю прамову Лукашэнка заклікам да міру «ў глабальным сэнсе».
— Трэба спыніцца, пакуль не позна, — сказаў Лукашэнка.
Расійская ТЯЗ у Беларусі — храналогія
25 траўня міністры абароны Беларусі і Расіі падпісалі дакументы, якія вызначаюць парадак трымання расійскай нестратэгічнай ядзернай зброі ў спецыяльным сховішчы на тэрыторыі Беларусі.
16 чэрвеня прэзідэнт Расіі Уладзімір Пуцін заявіў, што першыя ядзерныя снарады дастаўленыя ў Беларусь, дадаўшы, што да канца лета РФ гэтую працу выканае цалкам.
27 чэрвеня Лукашэнка паведаміў, што большая частка расійскай ядзернай зброі завезеная ў Беларусь.
У Крамлі не раз публічна падкрэслівалі, што рашэнне пра выкарыстанне тактычнай ядзернай зброі, якая размяшчаецца ў Беларусі, будзе прымацца не ў Мінску, а ў Маскве. Пра гэта гаварылі і прэс-сакратар прэзідэнта Расіі Дзмітрый Пяскоў, і міністр абароны РФ Сяргей Шайгу, і кіраўнік МЗС РФ Сяргей Лаўроў, і чалец-карэспандэнт Акадэміі ваенных навук Расіі Уладзімір Козін. Нават сам Лукашэнка не так даўно прызнаваў, што ён не зможа выкарыстаць расійскую тактычную ядзерную зброю — яму для гэтага трэба будзе тэлефанаваць Пуціну.
