Падаткавікі працягваюць выстаўляць кампаніям і індывідуальным прадпрымальнікам прэтэнзіі па драбненні бізнесу. У паведамленнях МПЗ часцей за ўсё такое парушэнне называюць незаконнай мінімізацыяй падатковых абавязанняў. Па новых кейсах, пра якія расказваюць падаткавікі, кампаніям выстаўляюць мільённыя рахункі да аплаты. І гэта лічыцца яшчэ «лёгкім» варыянтам, бо за такое парушэнне можна трапіць і пад крымінальны артыкул.
Гомельскія падаткавікі расказалі, што за 2022-ы і першы квартал гэтага года выявілі 7 выпадкаў, калі кампаніі выкарыстоўвалі схемы па «мінімізацыі падатковых абавязанняў шляхам драбнення бізнесу». «Сэнс гэтай схемы заключаецца ва ўхіленні ад выплаты падаткаў шляхам штучнага размеркавання выручкі паміж суб’ектамі гаспадарання, якія выкарыстоўваюць асаблівыя рэжымы падаткаабкладання і, як вынік, атрыманні неабгрунтаванай падатковай выгады», — расказалі ў інспекцыі МПЗ па Гомельскай вобласці.
У інспекцыі ўдакладняюць, што драбненне бізнесу могуць таксама выкарыстоўваць і індывідуальныя прадпрымальнікі. Падаткавікі прыводзяць прыклад, як ІП, які займаўся грузаперавозкамі па спрошчанай сістэме падаткаабкладання, зарэгістраваў яшчэ адно ІП на сваю жонку. Бізнесовец зрабіў гэта, як сцвярджаюць у падатковай, калі памер яго выручкі наблізіўся да столі, якую нельга перавышаць, каб заставацца на льготным падаткаабкладанні. «Ён перадаў жонцы ў бязвыплатную арэнду частку сваіх аўтамабіляў і перааформіў сваіх найманых работнікаў, — расказваюць у інспекцыі МПЗ. — Жанчына названай дзейнасцю не займалася, усім кіраваў муж. ІП сваю віну прызнаў і заплаціў падаходны падатак сумай 73 тысячы рублёў».
Канкрэтна ў гэтым выпадку выстаўленая да даплаты сума выйшла адносна невялікай. Калі гаворка ідзе пра кампаніі, то ім часцяком выстаўляюць мільённыя рахункі. Так, у Гомелі падаткавікі звярнулі ўвагу на чатыры прыватныя прадпрыемствы, заснавальнікамі якіх былі бацька і сын. Усе фірмы размяшчаліся на адной тэрыторыі і займаліся перавозкай грузаў. «Пры гэтым дзейнасць арганізацый і атрыманая імі выручка штучна дзялілася паміж усімі суб’ектамі гаспадарання, — сцвярджаюць падаткавікі. — Штучнае драбненне бізнесу дапамагло знізіць нагрузку на арганізацыю і ўхіліцца ад выплаты падаткаў». У гэтым выпадку выставілі да аплаты 3,6 млн рублёў. Гэта падатак на прыбытак і падатак на дабаўленую вартасць. Бізнесоўцы заплацілі гэтыя грошы ў бюджэт.
У Магілёве падаткавікі выставілі адной з кампаній да даплаты 1,2 млн рублёў, а ў Бабруйску — 4,4 млн рублёў. У абодвух выпадках гаворка ідзе пра даналічаныя падаткі і пеню, а кампаніі абвінавацілі ў драбненні бізнесу.
За такія парушэнні часта заводзяць «крыміналку», а засцерагчыся ад гэтых прэтэнзій складана
Заявы пра драбненне бізнесу ад органа кантролю пачалі актыўна з’яўляцца ў 2021 годзе. А ў 2022-м колькасць звязаных з гэтым выяўленых злачынстваў, мяркуючы з паведамленняў МПЗ і Дзяржкантролю, вырасла. Як правіла, калі пра такое парушэнне паведамляе КДК, то заводзяць крымінальную справу на ўладальнікаў кампаній (ці заўсёды іх змяшчаюць пад варту — невядома), налічваецца сума шкоды, нанесенай дзяржаве праз недаплачаныя падаткі і іншыя выплаты. Часта гучыць выяўлены факт парушэння артыкула 33 Падатковага кодэкса, у якой прапісаны парадак вызначэння і карэктавання падатковай базы. Дарэчы, у прыведзеных вышэй гісторыях з Магілёва і Бабруйска гаворка ідзе якраз пра парушэнне артыкула 33 Падатковага кодэкса.
Бізнесоўцы, якія сутыкаліся з павышанай увагай органаў кантролю ў сувязі з «драбненнем бізнесу», раней расказвалі «Люстэрку», што даведваліся раптам ад правяральнікаў, што нешта парушылі.
Адзін з юрыстаў раней выказваў меркаванне «Люстэрку», што засцерагчы сябе ад патэнцыйных прэтэнзій з боку падатковых органаў або Камітэта дзяржкантролю беларускім кампаніям практычна немагчыма, у тым ліку ў пытанні патэнцыйнага драбнення бізнесу.
Чытайце таксама
