У МЗС Беларусі пракаментавалі ўказ Аляксандра Лукашэнкі, які набывае моц з паўночы 7 верасня і якім уводзіцца забарона на абмен і выдачу пашпартоў беларусам за мяжой, — гэта можна будзе зрабіць толькі на тэрыторыі Беларусі.
«Беларускія замежныя ўстановы больш не ўпаўнаважаныя займацца пытаннямі выдачы/абмену/падаўжэння ўсіх відаў пашпартоў і ідэнтыфікацыйных карт. Названыя дзеянні можна ажыццявіць на тэрыторыі Беларусі», — гаворыцца ў ім.
Цяпер грамадзяне, якія аформілі пастаяннае пражыванне за межамі краіны і знаходзяцца на пастаянным консульскім уліку, змогуць звяртацца наконт абмену пашпартоў у галоўнае консульскае ўпраўленне МЗС альбо ў падраздзяленне па грамадзянстве і міграцыі УУС па месцы апошняй рэгістрацыі ў Беларусі (па месцы апошняга жыхарства бацькоў — для асобаў, якія не пражывалі ў Беларусі).
Апастыль таксама будзе прастаўляцца ў адным з кампетэнтных органаў у Беларусі (МЗС, Мінадукацыі, Мінюст і галоўныя ўпраўленні юстыцыі Мінгарвыканкама і аблвыканкамаў — у залежнасці ад тыпу дакумента). Падача дакументаў для прастаўлення апастылю магчымая толькі асабіста ўладальнікам дакумента альбо іншай асобай пры прад’яўленні даверанасці, аформленай у Беларусі.
Асабістая падача дакументаў у зацікаўлены орган таксама прадугледжаная і па шэрагу іншых адміністрацыйных працэдур, пералічаных ва ўказе (для атрымання даведак ЗАГС, паўторных пасведчанняў пра рэгістрацыю актаў грамадзянскага стану (акрамя смерці) і гэтак далей).
У МЗС адказалі, што звароты, пададзеныя беларусамі да ўступлення ўказа ў сілу, будуць разглядацца ў ранейшым парадку.
У ведамстве таксама расказалі, якія функцыі застануцца за пасольствамі і консульствамі: яны будуць па-ранейшаму займацца пытаннямі грамадзянства, консульскага ўліку, рэгістрацыяй актаў грамадзянскага стану, афармленнем пастаяннага пражывання за межамі Беларусі, выдаваць пасведчанні на вяртанне ў Рэспубліку Беларусь, сведчыць завяшчанні, згоды, адмовы, сведчыць дакладнасць копій і сапраўднасць подпісу на дакументах.
Нагадаем, Аляксандр Лукашэнка падпісаў указ, згодна з якім дыпмісіі больш не будуць выдаваць пашпарты беларусам, якія пастаянна пражываюць за мяжой. Таксама ўказ усталяваў новы парадак выдачы дакументаў і ажыццяўлення натарыяльных дзеянняў у замежных установах Беларусі. Цяпер, у прыватнасці, аформіць угоды з маёмасцю і выканаць некаторыя адміністрацыйныя працэдуры можна будзе пры асабістым звароце або на падставе даверанасці, аформленай на тэрыторыі Беларусі.