Урад збіраецца адмовіцца ад прывязкі да курса замежнай валюты цэн на тавары і тарыфаў на паслугі. Выканаць гэтую задачу збіраюцца да снежня 2025 года. Гэты план з’явіўся ў абноўленай праграме работы ўрада ў цяперашняй пяцігодцы (яна акурат заканчваецца ў 2025-м). Гаворка, хутчэй за ўсё, пра даляры і еўра, менавіта да іх прывязаныя некаторыя тарыфы і цэны. Раней чыноўнікі, да прыкладу, адвязалі ад даляра тарыфы на камунальныя паслугі — пра «варожасць» амерыканскай валюты, заяўляў Аляксандр Лукашэнка.
У плане працы ўрада да 2025 года з’явіўся пункт пра выключэнне магчымасці ставіць цэны, тарыфы і іншыя плацяжы ў замежнай валюце. Чыноўнікі таксама хочуць забараніць прывязваць цэны і тарыфы да курса валют. Для гэтага сярод іншага збіраюцца правесці рэвізію законаў, каб знайсці такія валютныя прывязкі.
Якія ўдары чыноўнікі ўжо нанеслі па валюце
У пачатку гэтага года ў Беларусі падоўжылі адвязку арэндных ставак ад курса валют — да 1 студзеня 2025-га. Калі арэнда дзяржаўнай нерухомасці прывязаная ў асноўным да беларускага рубля (базавай арэнднай велічыні), то арэнда прыватнай, як правіла, раней залежала ад курсаў еўра ці даляра. На гэтым фоне чыноўнікі раней да 1 студзеня 2024 года забаранілі вызначаць стаўкі арэнды камерцыйнай нерухомасці ў замежнай валюце. Іх прывязалі да беларускага рубля. Прычым гаворка пра любую маёмасць, пачынаючы ад офісных памяшканняў і машына-месцаў і заканчваючы аўтамабілямі і будаўнічай тэхнікай. Адпаведныя змены былі ўнесеныя ў Грамадзянскі і Банкаўскі кодэксы. Гэтыя змены датычаць камерцыйнай нерухомасці.
Раней у Беларусі да 1 красавіка 2024 года таксама замарозілі базавую арэндную велічыню і арэндныя стаўкі за карыстанне дзяржмаёмасцю — рухомай і нерухомай. То-бок гэты паказчык застанецца да названай даты на адным узроўні — 16,9 рубля. У кастрычніку мінулага года стала вядома, што Мінэканомікі выступае за тое, каб стаўкі арэнднай платы за карыстанне маёмасцю былі і далей прывязаныя да беларускага рубля, а не да валюты.
Хоць афіцыйна нельга прывязваць стаўкі па арэндзе да даляраў і еўра, на практыцы па-ранейшаму сустракаюцца такія выпадкі. Арандадаўцы і арандатары дамаўляюцца на карэктавальныя каэфіцыенты, калі курс валюты прыкметна зменіцца.
З 2020 года ў Беларусі ў нацвалюце пачалі прызначаць сямейны капітал. Раней з 2015 да 2019 года яго прызначалі ў далярах, ён складаў 10 тысяч.
У 2023 годзе рост тарыфаў на жыллёва-камунальныя паслугі ў Беларусі прывязалі да базавай велічыні, якая цяпер складае 40 рублёў. Максімальна дапушчальны рост плацяжоў не мусіць перавышаць паловы гэтай сумы замест раней уведзенага пяцідаляравага эквіваленту. Гэта зрабілі праз «варожасць» амерыканскай валюты, тлумачыў пазней Аляксандр Лукашэнка. «Вось яны (заходнія партнёры. — Заўв. рэд.) сышлі, разлікі ў далярах перакрылі нам, таму мы пераходзім на юані, расійскія рублі. Нас гэта задавальняе», — заяўляў палітык.
Чытайце таксама
