Аляксандр Лукашэнка ў Гродне наведаў пляцоўку будаўніцтва новай бальніцы. Там ён пагаварыў з міністрам аховы здароўя Аляксандрам Хаджаевым і экс-кіраўніком Мінздароўя, а цяпер губернатарам Гродзенскай вобласці Уладзімірам Каранікам, паведамляе яго прэс-служба.
«Кажуць, таго не хапае, гэтага не хапае. Дактароў, медсясцёр… Слухай, у нас усяго хапае. Толькі ў нас некаторыя катэгорыі, у тым ліку дактары, хочуць працаваць як у нас, а жыць як на Захадзе і атрымліваць вялікія грошы. Дык яны суткамі працуюць (на Захадзе. — Заўв. рэд.), асабліва моладзь. Гэта я ведаю дакладна. Суткамі працуюць. Але яны і зарабляюць», — заявіў Лукашэнка.
Ён звярнуў увагу, што і ў Беларусі дактары ў найлепшых клініках «зарабляюць вельмі прыстойныя грошы».
Згадаў ён і пандэмію каранавіруса, падчас якой медыкам увялі даплаты.
«У пандэмію плацілі дадаткова. Я ім сказаў: я вам гэта пакідаю. Пакінуў. Дактары не верылі, што гэта будзе. Мы пакінулі. Але далей трошкі і самім трэба варушыцца. Выдатная прафесія, выдатная спецыяльнасць. Лепшай, напэўна, у свеце няма. Вядома, і адказнасць, і паварушыцца трэба. Пераразмяркуйцеся і працуйце як след», — сказаў Лукашэнка.
Нагадаем, паводле новага кіраўніка Мінздароўя Аляксандра Хаджаева, у 2023 годзе сярэдняя зарплата работнікаў арганізацый аховы здароўя была самай высокай сярод усіх бюджэтных сфер — 1 618,9 рубля (тут і ніжэй сумы пазначаныя да выплаты падаткаў, то-бок на рукі атрымліваецца менш). Паводле ягоных звестак, дактары ў сярэднім атрымлівалі летась 2 841,5 рубля. Гэта на 49,4% вышэй за сярэдні заробак па краіне. А вось заробкі сярэдніх медыцынскіх работнікаў недацягвалі да гэтага паказчыка. Яны былі 1 576,3 рубля, што на 17,1% менш за сярэдні ўзровень аплаты працы ў цэлым па краіне.
Чыноўнік заявіў, што да 2025 года плануецца павысіць сярэдні паказчык месячнай аплаты працы ў галіне да сярэдняга па краіне.
Характэрна, што зусім нядаўна заробкі дактароў ацэньвалі вышэй — на ўзроўні 154,4% ад сярэдняга заробку па эканоміцы. Як паведамляў старшыня Беларускага прафесійнага прафсаюза медработнікаў Вячаслаў Шыла, сярэдні заробак у ахове здароўя летась быў 1 648,4 рубля. Гэтая сума таксама адрозніваецца ад заяўленай кіраўніком Мінздароўя.