Лідарка беларускіх дэмсілаў Святлана Ціханоўская звярнулася да беларусаў у гадавіну прэзідэнцкіх выбараў 2020 года. Яна назвала 9 жніўня днём годнасці і заклікала рыхтавацца да «новага моманту», каб разам скончыць пачатае чатыры гады таму.
— Чатыры гады таму адбыліся падзеі, якія памянялі нашую краіну і памянялі нас з вамі. Я памятаю тую неймаверную энергетыку на плошчах. Мы ўсе верылі ў хуткія перамены. Нам здавалася, што вось-вось дыктатура рухне і мы зможам пабудаваць краіну, пра якую так доўга марылі і за якую змагаліся, — сказала Ціханоўская, нагадаўшы, што ў тыя дні Беларусь не знікала з першых палосаў сусветнай прэсы.
Паводле лідаркі, гэта была рэвалюцыя годнасці, і 9 жніўня беларусы па ўсім свеце адзначаюць «наш дзень годнасці».
Яна верыць, што «ў беларусаў маўчанне — не значыць згода»:
— Гэта значыць, мы затаіліся, мы рыхтуемся да новага моманту, а ён абавязкова будзе.
Ціханоўская падзякавала людзям, якія засталіся ў Беларусі, за смеласць і цярплівасць, але папрасіла не рызыкаваць: «Не той момант».
— Сёння, калі рэжым душыць усё жывое, рэпрэсуе за лайкі ў фэйсбуку ці за беларускую мову, вы можаце будаваць кантакты, развіваць нефармальныя сувязі. На лакальным узроўні кожны можа несці праўду. Распаўсюджвайце навіны сярод сяброў, суседзяў, калегаў па працы. Нават невялікае, здавалася б, дробнае дзеянне мае значэнне, — прапануе палітык.
А беларусаў за мяжой яна заклікала праяўляць актыўнасць і салідарнасць, развіваць дыяспару.
— Давайце зробім усё магчымае, каб гэты мур рухнуў, як і ўся гэта бесчалавечная сістэма. А для гэтага — трэба працаваць з саюзнікамі. Умацоўваць сувязі паміж сабой. Натхняць і натхняцца. Памятаць, што самае галоўнае — гэта людзі. Гэта мы з вамі. Давайце клапаціцца і падтрымліваць адно аднаго. Разам мы ўсё адолеем і абавязкова завершым тое, што пачалі ў 2020-м, — заклікала Ціханоўская.
Шостыя ў гісторыі Беларусі прэзідэнцкія выбары адбыліся 9 жніўня 2020 года. На думку праваабаронцаў і міжнароднай супольнасці, выбарчы працэс прайшоў са шматлікімі парушэннямі і быў абсалютна непразрыстым.
Паводле афіцыйных вынікаў, Лукашэнка набраў 80,1% галасоў, а Святлана Ціханоўская — 10,12%. Між тым эксперты незалежнай платформы «Голас» прааналізавалі звесткі пратаколаў выбарчых участкаў і звесткі, дасланыя карыстальнікамі платформы, і прыйшлі да высновы, што за Ціханоўскую прагаласавала не менш за тры мільёны чалавек, або 56% выбаршчыкаў з улікам рэальнай яўкі.
Відавочныя парушэнні і фальсіфікацыі вынікаў на карысць Аляксандра Лукашэнкі, а таксама дзеянні сілавікоў выклікалі самыя маштабныя ў гісторыі краіны пратэсты, за якімі рушылі самыя маштабныя за ўвесь перыяд яго кіравання рэпрэсіі, якія працягваюцца дагэтуль.
