У Мінюсце расказалі, як беларусам, якія з’ехалі за мяжу, правільна аформіць даверанасць на продаж нерухомасці на радзіме.
Нагодай для публікацыі паслужыў зварот беларускі да натарыусаў. Жанчына расказала, што хоча купіць у Беларусі лецішча, але яе прадавец з’ехала ў замежную камандзіроўку. Яна пацікавілася, як гаспадыні нерухомасці правільна аформіць за мяжой даверанасць на сяброўку, каб тая змагла ад яе асобы ажыццявіць угоду.
У Мінюсце растлумачылі: калі грамадзянін знаходзіцца за мяжой, то для афармлення даверанасці яму неабходна звярнуцца да тых спецыялістаў, якія ажыццяўляюць натарыяльныя дзеянні ад імя Беларусі:
- да дыпламатычнага агента дыпламатычных прадстаўніцтваў Рэспублікі Беларусь;
- да консульскай службовай асобы консульскіх установаў Рэспублікі Беларусь.
Таксама для афармлення даверанасці прадавец можа звярнуцца да натарыуса замежнай дзяржавы. Такая даверанасць мусіць быць аформленая для дзеяння за мяжой і легалізаваная ў парадку, прадугледжаным міжнароднымі дамовамі.
Напрыклад, на даверанасці, заверанай натарыусам Партугаліі, дадаткова мусіць быць прастаўлены апастыль — гэта міжнародная стандартызаваная форма запаўнення звестак аб законнасці дакумента для прадстаўлення на тэрыторыі краін, якія прызнаюць такую форму легалізацыі.
Якія звесткі мусяць быць у даверанасці?
У даверанасці на продаж нерухомай маёмасці мусяць быць:
- ідэнтыфікацыйныя звесткі: прозвішча, імя, імя па бацьку, дата, месяц, год нараджэння, ідэнтыфікацыйны нумар, грамадзянства, месца жыхарства грамадзяніна;
- месца знаходжання нерухомай маёмасці;
- агаворваюцца цана, за якую прадстаўнік мае права яе прадаць, і іншыя ўмовы продажу або пакінуць прадстаўніку права заключыць дамову за яго цану і на яго ўмовах.
Скласці праект даверанасці дапаможа натарыус Беларусі
Зацікаўленая асоба ў Беларусі можа звярнуцца да любога натарыуса, які дапаможа падрыхтаваць праект даверанасці, улічыўшы ўсе неабходныя паўнамоцтвы.
Натарыус складзе праект даверанасці з улікам патрабаванняў беларускага заканадаўства і дасць кваліфікаваную кансультацыю па продажы нерухомай маёмасці.
