Яшчэ 29 чэрвеня Еўрапейскі саюз распаўсюдзіў на Беларусь санкцыі, якія раней уводзіў у дачыненні да Расіі. Роўна два тыдні таму, 4 ліпеня, беларусы пачалі паведамляць у тэматычных чатах пра строгія абмежаванні, дбайныя праверкі і масавыя «развароты» тых, хто спрабаваў вывезці хоць нейкія тавары з Польшчы. Што змянілася з таго часу? «Люстэрка» вывучыла чаты па перасячэнні мяжы і, здаецца, сітуацыя перастала быць такой драматычнай.
«Проста зазірнулі ў салон і багажнік»
Афіцыйна нічога не змянілася, ніякіх новых дакументаў ці тлумачэнняў ад польскага боку не выйшла. Але, мяркуючы з паведамленняў падарожнікаў у тэлеграм-чатах «Доставка РБ», «Граница BY», «Автобус «Брест — Тересполь», «Авто Брест — Тересполь», «Варшавка — граница Брест — Тересполь» і іншых падобных, праверкі зрабіліся не такімі строгімі. Апісанне «шманаюць на ўсю моц» цяпер да іх прымяніць нельга.
— Мы везлі алкаголь, шмат прысмакаў, шмат гарбаты і кавы, вітаміны і БАДы, ювелірныя ўпрыгожанні, шмат-шмат касметыкі, — піша ў адным з чатаў Аксана, якая перасякала мяжу 15 ліпеня. — З усіх новых рэчаў зрэзала біркі, дзве пары новых беласнежных красовак. Палякі проста зазірнулі ў салон і ў багажнік.
— Tax free афармляюць на бытавую хімію, сумкі скураныя, — расказвае ананімны карыстальнік, які заязджаў у Беларусь з Польшчы на аўтамабілі 11 ліпеня. — Дзяўчына побач адбівала вопратку і абутак і змудрылася адбіць нейкую запчастку для машыны. Але я так зразумеў, гэта на якую змену нарвешся.
Многія падарожнікі пішуць, што надгляды польскай мытні сталі менш пільнымі.
— Палякі глядзелі павярхоўна, адчынялі багажнікі і зачынялі. За маё праходжанне не бачыла, каб палякі кагосьці развярнулі, але вось у беларусаў, здаецца, дзве машыны на еўрапейскіх нумарах — так, — паведамляе Віёла, якая выехала на аўтамабілі з Польшчы 8 ліпеня.
Што наконт аўтобусаў?
Шматлікія падарожнікі пішуць, што пасажыраў аўтобусаў у кірунку Беларусі польскія мытнікі даглядаюць не вельмі ўважліва.
— Валізкі толькі [пусцілі] па стужцы, не капаліся, — дзеліцца Марыя, якая перасякала мяжу 12 ліпеня.
— Наогул валізкі не глядзелі, — пацвярджае Лілія, якая ехала ў тым самым кірунку 14 ліпеня.
— Нічога ні ў когда не правяралі, акрамя пашпартоў, — паведамляе Анастасія, якая ехалі гэтым маршрутам 12 ліпеня.
А беларуская мытня як правярае?
Беларусь ніякіх новых санкцый не ўводзіла. Але надгляды, паводле падарожнікаў, бываюць вельмі дбайныя.
— Кожная машына мусіла выкласці ўвесь свой тавар на стол, зазіралі ў кожную торбу, але рукамі прамацвалі не ўсюды, — піша Віёла пра праходжанне беларускай мытні.
— Беларусы глядзелі кожную торбу, — пацвярджае карыстальнік пад нікам Дзіма.
— Беларусы паглядзелі павярхоўна, але адправілі на гутарку і машыну на рэнтген, — дзеліцца досведам ананімны карыстальнік.
Каго не пускаюць з Беларусі ў Польшчу?
Нагадаем, у зваротным кірунку (з Беларусі ў Польшчу) дзейнічае забарона на ўвоз цыгарэт і алкаголю, ёсць таксама аб’ёмны спіс тавараў, забароненых для ўвозу ў ЕС. Але калі тавары для асабістага карыстання — іх везці можна. Мяркуючы з паведамленняў, звычайных людзей правяраюць не самым строгім чынам.
— У Польшчы было свабодна і досыць хутка глядзелі. Нас правяралі, але павярхоўна, нават торбаў не адкрывалі, мы яшчэ і з багажнікам на даху. Машына пад завязку, з закаткамі, шакалад і прысмакі і куча нашых рэчаў. Самі ў шоку былі, — расказала Алеся, якая заехала ў Польшчу 16 ліпеня.
— Усё вельмі хутка. У аўтобусе было 12 чалавек, рэчаў мінімум. Уручную паглядзелі толькі асабістыя рэчы, з багажніка нічога не даставалі, — піша Таццяна, яна падарожнічала ў Польшчу на аўтобусе 16 ліпеня.
Наталля ж наогул расказала, што стала ахвярай розыгрышу. Але ў выніку перасекла мяжу без праблем.
— Падчас праверкі мытнік: «Агуркі нельга — штраф 300 злотых (243 рублі паводле курсу НБ РБ на 18 ліпеня. — Заўв. рэд.)», — падзялілася жанчына. — Чыпсы ў пакеце ляжалі — санкцыі, вада — санкцыі, Бялізны — нельга, рулон туалетнай паперы пачаты — разварот. На нейкім моманце пляменнік зразумеў, што ён жартуе. А мы, дзве дзяўчынкі, тварамі памяняліся. Але думаю, што калі б захацелі, то вярнулі б нас. Але, дзякуй богу, усё абышлося.
А вось калі не атрымаецца даказаць, што рэчы асабістыя, магчымыя праблемы.
— Аднаго завярнулі пры мне за каністру саляры і запаску 22 дыяметры пры ягоных 20… Як ні даказваў — паехаў на разварот, — напісаў Аляксандр, які перасякаў мяжу на аўтамабілі 11 ліпеня.
Важны момант: аўтамабілі на беларускіх нумарах могуць заехаць у Польшчу, толькі калі за рулём уладальнік, пазначаны ў дакументах. І гэтую акалічнасць, мяркуючы з паведамленняў падарожнікаў, правяраюць вельмі старанна.
— Учора перада мной развярнулі мужыка на «Таёце». Яму было сказана, што яго звесткі мусяць быць запісаныя ў пашпарце як уладальніка. Паўгадзіны ён ім спрабаваў нешта даказаць. Паказваў кучу папер: аўто на фірме, ён адзіны заснавальнік. Разварот, — падзяліўся гісторыяй Валерый, які падарожнічаў 9 ліпеня.
Чытайце таксама
