Паводле інфармацыі праваабаронцаў «Вясны», у Наваполацкай калоніі № 1 кожны дзень прымушаюць палітвязняў пісаць прашэнні пра памілаванне. Але гэта датычыць не ўсіх палітычных асуджаных, пішуць праваабаронцы.
Размаўляць з палітвязнямі пра напісанне прашэнняў прыязджаюць прадстаўнікі Мінскай пракуратуры. Датычыць гэта толькі асуджаных на невялікія тэрміны, адзначаюць праваабаронцы.
Вядома, што ў некаторых калоніях палітвязняў за адмову пісаць прашэнне змяшчаюць у штрафны ізалятар (ШІЗА), а некаторым пагражаюць новай крымінальнай справай па арт. 411 КК (Злоснае непадпарадкаванне патрабаванням адміністрацыі папраўчай установы).
Нядаўна Dissidentby таксама паведамляў пра масавы збор прашэнняў пра памілаванне ад палітвязняў у калоніях, турмах і на «хіміі» (у папраўчых установах адкрытага тыпу), дадалі ў «Вясне».
Нагадаем, раней крыніца «Радыё Свабода» паведамляла, што палітвязням, тэрміны якіх блізкія да завяршэння, прапанавалі напісаць прашэнні пра памілаванне на імя Аляксандра Лукашэнкі. Гэта датычыла вязняў калоніі № 15 пад Магілёвам.
Паводле інфармацыі «Вясны», 3 ліпеня на волю па амністыі ці памілаванні выйшлі 18 палітвязняў. Сярод іх — чатыры жанчыны і 14 мужчын, уключаючы хворага на анкалогію Рыгора Кастусёва.
Спачатку публічна называлася толькі імя Кастусёва. Пазней стала вядома, што на волю з Гомельскай жаночай калоніі выйшлі палітвязні Дар’я Лосік, Святлана Лупач, Паліна Палавінка, Тамара Астрэйка і Кацярына Мадзянкова.
Праваабаронцы падтрымліваюць інфармацыйнае маўчанне для бяспекі зняволеных, таму пакуль не публікуюць імёнаў астатніх вызваленых.
Некаторыя палітвязні адмовіліся выходзіць, не пагадзіўшыся з умовамі вызвалення, паведамляў ПЦ «Вясна».