Украіна збіраецца выйсці з некалькіх міжнародных дамоваў, заключаных з Беларуссю ў рамках СНД. Акрамя таго, участак мяжы з нашай краінай будзе выключаны з зоны адчужэння ЧАЭС.
МЗС Украіны ініцыявала чарговы разрыў шэрагу міжнародных дамоваў з Расіяй, Беларуссю і СНД. Напярэдадні, 3 верасня, распрацаванае ведамствам распараджэнне ўхваліў украінскі Кабінет міністраў.
Гаворка ідзе пра дэнансацыю 14 міжнародных дамоваў у вайсковай, энергетычнай, фінансавай, эканамічнай, транспартнай, сацыяльнай і медыцынскай сферах. Пяць з іх Украіна заключыла з Расіяй, чатыры — з Беларуссю, яшчэ пяць пагадненняў былі заключаныя ў рамках СНД.
«Практычнае супрацоўніцтва з Расіяй і Беларуссю даўно спыненае. Але важна таксама юрыдычна адключыць гэтыя сотні дратоў, якімі нашая дзяржава была далучаная да Масквы і краін СНД. Гэта доўгая і сістэмная праца, якую мы паскараем унясеннем адпаведных рашэнняў пакетамі», — пракаментаваў міністр замежных справаў Украіны Дзмітрый Кулеба.
Акрамя таго, Украіна збіраецца выключыць 50-метровы ўчастак мяжы з Беларуссю з зоны адчужэння ЧАЭС — напярэдадні адпаведны праект указа Уладзіміра Зяленскага быў узгоднены ва ўрадзе краіны.
Украіна выключыла 50-метровую паласу ўздоўж мяжы з Беларуссю з Чарнобыльскай зоны адчужэння, каб нібыта гарантаваць бяспеку і абарону на гэтым участку, паведамляе ўкраінскае МУС.
Гэтае рашэнне дапаможа памежнай службе Украіны забяспечыць «належную ахову і абарону ўкраінска-беларускай мяжы», паведамілі ў МУС Украіны.